ଚୀନର ଜାତିଗତ ଏକତା ଆଇନ: ବିବିଧତାର ସୁରକ୍ଷା ନା ସମାନତାର ଚାପ?
କଟକ ( ଉତ୍କଳ ନ୍ୟୁଜ ) ୦୪-୦୮-୨୦୨୬: ଜୁଲାଇ ୧, ୨୦୨୬ରୁ କାର୍ଯ୍ୟକାରୀ ହୋଇଥିବା ଚୀନର "ଜାତିଗତ ଏକତା ଏବଂ ପ୍ରଗତି ପ୍ରୋତ୍ସାହନ ଆଇନ" ଦେଶର ଜାତିଗତ ସଂଖ୍ୟାଲଘୁ ସମ୍ପ୍ରଦାୟ ପ୍ରତି ବେଜିଂର ନୀତିରେ ଏକ ନୂଆ ଏବଂ ନିର୍ଣ୍ଣାୟକ ପରିବର୍ତ୍ତନର ସଙ୍କେତ ଦେଇଛି। ଚୀନ ସରକାର ଏହାକୁ ଜାତୀୟ ଏକତା, ସାମାଜିକ ସ୍ଥିରତା ଓ ସମନ୍ଵୟକୁ ସୁଦୃଢ଼ କରିବା ପାଇଁ ଏକ ଆବଶ୍ୟକ ପଦକ୍ଷେପ ବୋଲି ଦାବି କରୁଥିବାବେଳେ ଆନ୍ତର୍ଜାତିକ ପର୍ଯ୍ୟବେକ୍ଷକ, ମାନବାଧିକାର ସଂଗଠନ ଏବଂ ଅନେକ ବିଶ୍ଳେଷକ ମତ ପ୍ରକାଶ କରିଛନ୍ତି ଯେ ଏହି ଆଇନର ପ୍ରକୃତ ଉଦ୍ଦେଶ୍ୟ ଜାତିଗତ ବିବିଧତାକୁ ସୁରକ୍ଷା ଦେବା ନୁହେଁ, ବରଂ ଏକରୂପତାକୁ ପ୍ରତିଷ୍ଠା କରିବାର ପ୍ରୟାସ। ସମାଲୋଚକଙ୍କ ମତରେ ଏହି ଆଇନ ଉଇଘୁର, ତିବ୍ବତୀ, ମଙ୍ଗୋଲିଆନ ଓ ଅନ୍ୟାନ୍ୟ ସଂଖ୍ୟାଲଘୁ ସମ୍ପ୍ରଦାୟର ସ୍ବତନ୍ତ୍ର ଭାଷା, ସଂସ୍କୃତି, ପରମ୍ପରା ଏବଂ ଧାର୍ମିକ ପରିଚୟକୁ ଧୀରେ ଧୀରେ ଦୁର୍ବଳ କରି ସେଗୁଡ଼ିକୁ କମ୍ୟୁନିଷ୍ଟ ପାର୍ଟିକୁ କେନ୍ଦ୍ର କରି ଗଢ଼ାଯାଇଥିବା ଏକକ "ଚାଇନିଜ୍ ନେସନ୍ କମ୍ୟୁନିଟି ରେ ମିଶାଇବା। ଏଥିପାଇଁ ଏହି ଆଇନକୁ ଅନେକ ଜାତିଗତ ଏକତାର ଆଇନ ନୁହେଁ ବରଂ ସାଂସ୍କୃତିକ ଆତ୍ମସାତ୍ମକରଣକୁ ଆଇନଗତ ସ୍ବୀକୃତି ଦେବାର ଏକ ପଦକ୍ଷେପ ବୋଲି ବିବେଚନା କରୁଛନ୍ତି । ଏହି ଆଇନ କେବଳ ଶିକ୍ଷାକ୍ଷେତ୍ରରେ ସୀମିତ ନୁହେଁ । ଏହା ସରକାରୀ ସଂସ୍ଥା, ବ୍ୟବସାୟିକ ପ୍ରତିଷ୍ଠାନ, ସାମାଜିକ ସଂଗଠନ ଏବଂ ଧାର୍ମିକ ଅନୁଷ୍ଠାନଗୁଡ଼ିକୁ ମଧ୍ୟ ଏକକ ଜାତୀୟ ପରିଚୟକୁ ପ୍ରୋତ୍ସାହିତ କରିବାକୁ ବାଧ୍ଯ କରେ । ବିଶେଷକରି ଧାର୍ମିକ ଅନୁଷ୍ଠାନଗୁଡ଼ିକୁ "ସିନିସାଇଜେସନ୍ ନୀତି ଅନୁସରଣ କରି ଧାର୍ମିକ ବିଶ୍ଵାସ ଓ ପରମ୍ପରାକୁ ରାଜ୍ୟର ସମାଜବାଦୀ ଆଦର୍ଶ ସହ ଖାପ ଖୁଆଇବାକୁ କୁହାଯାଇଛି। ସମାଲୋଚକଙ୍କ ମତରେ ଏହା ଧାର୍ମିକ ସ୍ବାଧୀନତା ଉପରେ ରାଜ୍ୟର ଚିନ୍ତାଧାରାକୁ ପ୍ରାଧାନ୍ୟ ଦେଉଛି। ଏହି ଆଇନର ସବୁଠାରୁ ବିବାଦୀୟ ଦିଗ ହେଉଛି ଏହାର ପ୍ରଭାବ ଚୀନ ସୀମା ବାହାରକୁ ମଧ୍ୟ ବିସ୍ତାରିତ ହେବା I ଆଇନ ଅନୁଯାୟୀ ବିଦେଶରେ ଥିବା କୌଣସି ବ୍ୟକ୍ତି କିମ୍ବା ସଂଗଠନ ଯଦି ଜାତିଗତ ବିଚ୍ଛିନ୍ନତାକୁ ପ୍ରୋତ୍ସାହନ ଦେଉଛନ୍ତି କିମ୍ବା ଚୀନର ଜାତୀୟ ଏକତାକୁ କ୍ଷୁଣ୍ଣ କରୁଛନ୍ତି ବୋଲି ଅଭିଯୋଗ ହୁଏ ତେବେ ସେମାନଙ୍କ ବିରୋଧରେ ଆଇନଗତ ପଦକ୍ଷେପ ନିଆଯାଇପାରିବ। ଏହାକୁ ନେଇ ଆଶଙ୍କା ପ୍ରକାଶ ପାଇଛି ଯେ ବେଜିଂ ଏହି ବ୍ୟବସ୍ଥାକୁ ବ୍ୟବହାର କରି ତିବ୍ବତ, ଜିନର୍ଜିଆଙ୍ଗ ଓ ଅନ୍ୟାନ୍ୟ ସଂଖ୍ୟାଲଘୁ ପ୍ରସଙ୍ଗରେ ସ୍ୱର ଉଠାଉଥିବା ବିଦେଶସ୍ଥ କର୍ମୀ, ଗବେଷକ ଓ ପ୍ରବାସୀ ସମ୍ପ୍ରଦାୟଙ୍କ ଉପରେ ଚାପ ସୃଷ୍ଟି କରିପାରେ। ଜିନଜିଆଙ୍ଗର ଉଇଘୁର ସମ୍ପ୍ରଦାୟ ପାଇଁ ଏହି ଆଇନ ପୂର୍ବରୁ ଚାଲିଆସୁଥିବା ବିବାଦୀୟ ନୀତିଗୁଡ଼ିକୁ ଆଇନଗତ ସ୍ୱୀକୃତି ଦେଇଛି I ଗଣବନ୍ଦୀ, ବଳପୂର୍ବକ ଶ୍ରମ, ଧାର୍ମିକ ସ୍ବାଧୀନତା ଉପରେ କଟକଣା, ପରିବାର ବିଚ୍ଛିନ୍ନତା ଏବଂ ସାଂସ୍କୃତିକ ଐତିହ୍ୟର ଧ୍ବଂସ ଭଳି ପଦକ୍ଷେପକୁ ନେଇ ପୂର୍ବରୁ ଆନ୍ତର୍ଜାତିକ ସ୍ତରରେ ଚିନ୍ତା ପ୍ରକାଶ ପାଇଥିଲା I ଏହି ଆଇନକୁ ନେଇ ଆନ୍ତର୍ଜାତୀୟ ସ୍ତରରେ ତୀବ୍ର ସମାଲୋଚନା ହୋଇଛି | ମାନବାଧୂକାର ସଂଗଠନ, ପାଶ୍ଚାତ୍ୟ ଦେଶ ଏବଂ ତିବ୍ବତୀୟ ଓ ଉଇଘୁର ନିର୍ବାସିତ ସମ୍ପ୍ରଦାୟ ଏହାକୁ ସଂଖ୍ୟାଲଘୁ ସଂସ୍କୃତିକୁ ଲୋପ କରିବାର ଏକ ପ୍ରୟାସ ବୋଲି ବର୍ଣ୍ଣନା କରିଛନ୍ତି। ଅନ୍ୟପକ୍ଷରେ ଚୀନ ସରକାର ସମସ୍ତ ସମାଲୋଚନାକୁ ଖଣ୍ଡନ କରିଛି I ବେଜିଂର ମତରେ, ଏହି ଆଇନ ଜାତୀୟ ଏକତା, ସାର୍ବଭୌମତ୍ଵ ଓ ସାମାଜିକ ସ୍ଥିରତାକୁ ସୁଦୃଢ଼ କରିବା ପାଇଁ ଏକ ବୈଧ ପଦକ୍ଷେପ। ସରକାର କହିଛି ଯେ ଏହାର ଉଦ୍ଦେଶ୍ୟ ବିଚ୍ଛିନ୍ନତାବାଦ ଓ ଉଗ୍ରବାଦକୁ ରୋକିବା ସହ ସମସ୍ତ ଜାତିଗତ ଅଞ୍ଚଳର ସମାନ ବିକାଶ ସୁନିଶ୍ଚିତ କରିବା ଏବଂ ଏହା ଶିକ୍ଷା, ବାଣିଜ୍ୟ କିମ୍ବା ସାଧାରଣ ସାଂସ୍କୃତିକ ଆଦାନ-ପ୍ରଦାନରେ କୌଣସି ବାଧା ସୃଷ୍ଟି କରୁ ନାହିଁ।ଭାରତ ଏହି ଆଇନ ପ୍ରତି ସତର୍କ ଓ ସନ୍ତୁଳିତ ପ୍ରତିକ୍ରିୟା ପ୍ରକାଶ କରିଛି। ଧର୍ମଶାଳାସ୍ଥିତ କେନ୍ଦ୍ରୀୟ ତିବ୍ବତୀୟ ପ୍ରଶାସନ (CTA) ଏହାକୁ ତିବ୍ବତୀୟ ପରିଚୟ ଉପରେ ସିଧାସଳଖ ଆକ୍ରମଣ ବୋଲି ବର୍ଣ୍ଣନା କରି କଡ଼ା ବିରୋଧ କରିଛିI CTA ସଭାପତି ପେନପା ସେରିଂ କହିଛନ୍ତି ଯେ ସାଂସ୍କୃତିକ ଓ ଧାର୍ମିକ ବିବିଧତାକୁ ସମ୍ମାନ ଦେବାରେ ଭାରତର ପରମ୍ପରା ଓ ଚୀନର ସାଂସ୍କୃତିକ ଏକରୂପତା ନୀତି ଭିତରେ ଅନେକ ପାର୍ଥକ୍ୟ । ଚୀନର ନୂତନ ଜାତିଗତ ଏକତା ଆଇନ କେବଳ ଏକ ଘରୋଇ ଆଇନ ନୁହେଁ; ଏହା ରାଷ୍ଟ୍ର ଗଠନ ସମ୍ପର୍କରେ ବେଜିଂର ବ୍ୟାପକ ଦୃଷ୍ଟିକୋଣକୁ ପ୍ରତିଫଳିତ କରେ। ଏହି ଆଭିମୁଖ୍ୟରେ ବିବିଧତାକୁ ଏକ ଶକ୍ତି ଭାବରେ ନୁହେଁ ବରଂ ରାଜନୈତିକ ଏକତା ପାଇଁ ଏକ ସମ୍ଭାବ୍ୟ ଚ୍ୟାଲେଞ୍ଜ ଭାବେ ଦେଖାଯାଉଛି । ସାଂସ୍କୃତିକ ଆତ୍ମସାତ୍ମକରଣକୁ ଆଇନଗତ ସମର୍ଥନ ଦେଇ ଚୀନ ସରକାର ସ୍ପଷ୍ଟ କରିଛି ଯେ ସମସ୍ତ ଜାତିଗତ ସମ୍ପ୍ରଦାୟକୁ କମ୍ୟୁନିଷ୍ଟ ପାର୍ଟି ଦ୍ବାରା ପରିଭାଷିତ ଏକକ ଜାତୀୟ ପରିଚୟ ସହିତ ଖାପ ଖୁଆଇବାକୁ ହେବ। ତଥାପି ଏହି ପଦ୍ଧତି ଦୀର୍ଘସ୍ଥାୟୀ ଏକତା ଆଣିପାରିବ କି ନାହିଁ, ତାହା ନେଇ ପ୍ରଶ୍ନ ରହିଛି। ଇତିହାସ କୁହେ ଯେ ବିବିଧତାକୁ ସମ୍ମାନ ଓ ସୁରକ୍ଷା ଦେଇଥିବା ସମାଜ ଅଧିକ ସ୍ଥାୟୀ ଭାବରେ ଏକତା ବଜାୟ ରଖିପାରେ । ଆଇନଗତ ଚାପ ମାଧ୍ୟମରେ ସୃଷ୍ଟି ହୋଇଥିବା ଏକତାଠାରୁ ବିଶ୍ବାସ, ସମାବେଶ ଓ ପାରସ୍ପରିକ ସମ୍ମାନ ଦ୍ବାରା ଗଢ଼ିଉଠିଥିବା ଏକତା ଅଧିକ ସୁଦୃଢ଼ ଓ ସ୍ଥାୟୀ ହୋଇଥାଏ। ଚୀନର ନୂତନ ଆଇନ ଏକ ମୌଳିକ ପ୍ରଶ୍ନ ଉଠାଉଛି ଯେ ପ୍ରକୃତ ଜାତୀୟ ଏକତା ସାଂସ୍କୃତିକ ପାର୍ଥକ୍ୟକୁ ହ୍ରା